Արժևորենք մեր մեծերի անցած ուղին.

Ավելի քան 50 տարի առաջ ԵՕՀՊՄ քոլեջում Արշակուհի Ադանալյանը ստանձնեց օտար լեզվի դասավանդման պարտականությունը։ Տակավին երիտասարդ ուսուցչուհու նորամուտը մարզօջախ պահանջում էր առավել զգոնություն և պատասխանատվություն, որտեղ ժամանակը մեծ փորձառություն տվեց, ինչն առավել նշանակալի դարձավ սաների հաղթանակների ներքո։

Ա․ Ադանալյանը բարձրագույն կրթությունը ստացել է Վ. Բրյուսովի անվան օտար լեզուների ինստիտուտում։ Աշխատանքային գործունեությունը սկսել է ՀՀ Կրթության նախարարությունում, ապա շարունակել ԵՕՀՊՄ քոլեջում։ Փորձառու մանկավարժի կարևոր ձեռքբերումը եղել է կիրթ, հայրենասեր և կարգապահ մարզիկների պատրաստումը, ովքեր իրենց արժանի տեղն են գտել հասարակության մեջև և իրենց բնագավառներում հասել նշանակալի հաջողության։

Տիկին Ադանալյանը ջերմությամբ է հիշում իր շրջանավարտներին, ովքեր տարիներ անց վերադառնում են հարազատ քոլեջ՝ իրենց սերն ու երախտագիտությունը հայտնելու ուսուցիչներին։ Հպարտանում է իր անվանի սաներով՝ ծանրորդ Երվանդ Կիրակոսյան, ըմբիշ Արսեն Հարությունյան և այլք, անսահման կարոտով է հիշում Արցախյան 44-օրյա պատերազմի հերոս Միշա Ղալումյանին։

Վաստակաշատ մանկավարժը ԵՕՀՊՄ քոլեջը համարում է բարձրակարգ կրթօջախ և ցանկանում է, որ այն հարատև խաղաղության պայմաններում շարունակի իր հայրենանվեր առաքելությունը, իսկ մատաղ սերնդին մայրաբար հորդորում է հարգել և արժևորել այն ամենն, ինչ փոխանցվում է իրեն։